لاہور( شوبز ڈیسک)اداکارہ مومنہ اقبال کی بہن رمشا اقبال نے ایک لیگی رکنِ صوبائی اسمبلی ثاقب چدھڑ کے خلاف نیشنل سائبر کرائم انویسٹی گیشن ایجنسی میں درخواست دائر کرنے کا اعلان کیا ہے۔میڈیا سے گفتگو کرتے ہوئے رمشا اقبال نے کہا کہ وہ اپنی بہن کے نکاح پر سب کی مبارکباد قبول کرتی ہیں اور ان کے مطابق یہ ان کے خاندان کے لیے ایک اہم پیش رفت ہے کہ متعلقہ ادارے نے معاملے پر کارروائی کرتے ہوئے مقدمہ درج کر لیا ہے۔انہوں نے مؤقف اختیار کیا کہ یہ ادارہ جاتی کارروائی ان کے الزامات کی تائید کرتی ہے اور ان کے مطابق اس سے ان کے دعوؤں کو تقویت ملی ہے۔رمشا اقبال نے مزید کہا کہ وہ آئندہ بھی قانونی راستہ اختیار کریں گی اور پیر کے روز ایک نئی درخواست بھی جمع کرائیں گی۔انہوں نے یہ بھی کہا کہ وہ اپنے مؤقف سے پیچھے نہیں ہٹیں گی اور متعلقہ سیاسی شخصیت کو اپنے مؤقف کے حق میں ثبوت پیش کرنے چاہییں، خصوصاً ان مالی دعوؤں سے متعلق جن کا ذکر کیا گیا ہے۔اس معاملے میں حکومتی سطح پر غیر جانب داری اختیار کرنے پر انہوں نے وزیراعلیٰ پنجاب مریم نواز کا بھی شکریہ ادا کیا۔
