نیو یارک( ویب ڈیسک)فولڈ ایبل اسمارٹ فونز میں وسیع اسکرین کے نئے رجحان کے درمیان موٹرولا بھی بک اسٹائل فولڈ ایبل فون تیار کرنے پر کام کر رہا ہے۔ اس سے قبل سام سنگ اور ہواوے سمیت دیگر کمپنیاں اس طرز کے فونز پیش کرچکی ہیں، جبکہ ایپل کے ممکنہ فولڈ ایبل آئی فون سے متعلق بھی وائیڈ اسکرین ایسپیکٹ ریشو کی اطلاعات سامنے آچکی ہیں۔رپورٹس کے مطابق موٹرولا کے نئے فولڈ ایبل فون کے مبینہ ڈیزائن اسکیچز منظرعام پر آئے ہیں، جن میں ڈیوائس کو کھولنے کے بعد نسبتاً وسیع ڈسپلے کے ساتھ دکھایا گیا ہے۔ بظاہر ہاتھ سے تیار کیے گئے ان خاکوں سے فون کے مجموعی ڈیزائن کا ابتدائی اندازہ لگایا جاسکتا ہے۔مبینہ تصاویر میں فون کے پچھلے حصے پر افقی کیمرا بار دکھائی دیتی ہے، جس میں ممکنہ طور پر دو کیمرا لینز کے ساتھ فلیش یا اضافی سینسر موجود ہوگا۔ کیمرا ماڈیول کا انداز گوگل پکسل فونز سے ملتا جلتا ہے، جبکہ اس بار کا ایک مقصد فون کو میز پر رکھنے کے دوران اسے غیر ضروری طور پر ہلنے سے روکنا بھی ہوسکتا ہے۔اندرونی اسکرین پر پنچ ہول سیلفی کیمرا بھی دکھائی دیتا ہے۔ تاہم فون کے حتمی سائز، ڈسپلے کے ابعاد، ہارڈویئر، قیمت اور لانچ کی تاریخ سے متعلق تاحال کوئی حتمی تفصیلات سامنے نہیں آئی ہیں۔
