ممبئی( شو بز ڈیسک)بھارتی اداکار عرفان خان سے ان کے آخری ایام میں ملاقات کے حوالے سے اداکار نانا پاٹیکر کی ایک پرانی گفتگو دوبارہ سوشل میڈیا پر گردش کرنے لگی ہے، جس میں انہوں نے مرحوم اداکار سے ملاقات کی یادیں بیان کی تھیں۔وائرل ہونے والی ویڈیو میں نانا پاٹیکر، ہدایت کار وشال بھردواج سے گفتگو کرتے ہوئے بتاتے ہیں کہ وہ ممبئی میں عرفان خان کے گھر ان سے ملنے گئے تھے، جہاں اداکار شدید علیل تھے۔نانا پاٹیکر کے مطابق عرفان خان نے ملاقات کے دوران انہیں بتایا تھا کہ انہیں رات کی رانی کا پودا بہت پسند ہے اور وہ اس بات کو یاد رکھیں۔اداکار نے ویڈیو میں یہ بھی کہا کہ کبھی کبھی ان کے دل میں خیال آتا ہے کہ انہیں ممبئی کے علاقے مادھ میں واقع عرفان خان کے گھر رات کی رانی کا پودا لگانا چاہیے۔واضح رہے کہ عرفان خان 29 اپریل 2020ء کو 53 برس کی عمر میں ایک نایاب رسولی، نیورو اینڈوکرائن ٹیومر، کے باعث انتقال کر گئے تھے۔
