نیو یارک( ویب ڈیسک) امریکی خلائی تحقیقاتی ادارہ ایک نئی اور انتہائی طاقتور کمپیوٹر چِپ تیار کر رہا ہے جو مستقبل کے خلائی مشنز میں انقلابی تبدیلیاں لا سکتی ہے۔کمرشل شراکت داری کے تحت تیار کی جانے والی یہ جدید پروسیسنگ چِپ خلائی جہازوں کو اس قابل بنائے گی کہ وہ خلا میں حاصل ہونے والے ڈیٹا کو زیادہ تیزی سے پراسیس کر سکیں اور زمین سے دور مشنز کے دوران بعض فیصلے خود مختاری سے انجام دے سکیں۔خلائی ادارے کا یہ منصوبہ اعلیٰ کارکردگی پر مبنی خلائی کمپیوٹنگ کے نظام کو بہتر بنانے پر مرکوز ہے، جس کا مقصد تحقیقاتی مشنز میں استعمال ہونے والے خلائی جہازوں کی صلاحیتوں میں اضافہ کرنا ہے۔اس وقت بیشتر خلائی مشنز میں پرانی نسل کے پروسیسرز استعمال کیے جاتے ہیں جو سخت خلائی ماحول میں قابلِ اعتماد تو ضرور ہیں لیکن جدید سائنسی ضروریات کے مطابق محدود کارکردگی رکھتے ہیں۔ماہرین کے مطابق نئی نسل کی یہ چِپ خلائی جہازوں کو زیادہ خود مختار بنانے، ڈیٹا کے فوری تجزیے اور مستقبل میں چاند اور مریخ جیسے مشنز کے دوران بہتر معاونت فراہم کرنے میں اہم کردار ادا کرے گی۔
