لاہور( شوبز ڈیسک) قانونی نوٹس موصول ہونے کے بعد مذہبی سکالر ناصر مدنی نے اداکارہ مومنہ اقبال سے عوامی سطح پر معذرت کا اظہار کر دیا۔اپنے ویڈیو بیان میں ناصر مدنی نے کہا کہ اگر ان کی کسی بات سے مومنہ اقبال یا ان کے اہلِ خانہ کی دل آزاری ہوئی ہے تو وہ اس پر معذرت خواہ ہیں۔ ان کے مطابق کسی کی دل آزاری ان کا مقصد نہیں تھا، اسی لیے وہ عوامی سطح پر معافی مانگ رہے ہیں۔ناصر مدنی نے اپنے بیان میں تمام بیٹیوں سے اپیل کی کہ وہ ایک دوسرے کے احترام اور حقوق کے تحفظ کے لیے آواز بلند کریں۔ انہوں نے کہا کہ ہر پاکستانی بیٹی کی عزت اور وقار کا تحفظ ہم سب کی مشترکہ ذمہ داری ہے کیونکہ بیٹیاں سب کی سانجھی ہوتی ہیں۔واضح رہے کہ چند روز قبل ناصر مدنی کا اداکارہ مومنہ اقبال سے متعلق ایک بیان سوشل میڈیا پر وائرل ہوا تھا، جس کے بعد مومنہ اقبال نے قانونی کارروائی کا آغاز کیا۔ اس معاملے کی پیروی اداکارہ کی بہن رمشہ اقبال نے کی، جس کے بعد ناصر مدنی نے ویڈیو پیغام کے ذریعے معذرت کا اظہار کیا۔
