ممبئی( شوبز ڈیسک) بالی ووڈ کے معروف اداکار نوازالدین صدیقی کے دو ٹوک بیان نے ہندی فلمی صنعت میں سچائی اور کہانی بیان کرنے کے انداز پر نئی بحث چھیڑ دی ہے۔ایک بھارتی ٹی وی پروگرام میں گفتگو کرتے ہوئے نوازالدین صدیقی نے موجودہ دور کی فلموں کو جعلی قرار دیتے ہوئے سخت تنقید کی۔ ان کا کہنا تھا کہ مصنوعی کہانیاں ہندی سینما کی سمت کا تعین کر رہی ہیں، جبکہ ناظرین اب ان کہانیوں کے پیچھے چھپی حقیقت کو بخوبی سمجھنے لگے ہیں۔انہوں نے کہا کہ معاشرے کو غلط سمت میں لے جانے کی ضرورت نہیں، سچائی سب سے زیادہ اہم ہے اور آج کے دور میں ہر شخص حقیقت سے آگاہ ہے۔ ان کے مطابق جو فلمیں بن رہی ہیں، ان کے پس منظر کو سب جانتے ہیں مگر اس پر کھل کر بات نہیں کی جاتی۔پروگرام کے دوران اداکار سے یہ سوال بھی کیا گیا کہ موجودہ عالمی کشیدگی کے تناظر میں کیا فلم سازوں کو سینما کے ذریعے معاشرے کی رہنمائی کرنی چاہیے، جس پر انہوں نے سچائی پر مبنی کہانیوں کی اہمیت پر زور دیا۔
