این سی اے اور ایل سی سی اے گراؤنڈ کی جدید سہولیات کے لیے اپ گریڈیشن شروع

لاہور ( سپورٹس ڈیسک)نیشنل کرکٹ اکیڈمی (این سی اے) اور ایل سی سی اے گراؤنڈ کی جدید خطوط پر بہتری کا منصوبہ شروع کر دیا گیا ہے، جس کے تحت دونوں مقامات کو عالمی معیار کی سہولیات سے مزین کیا جائے گا۔ذرائع کے مطابق این سی اے اور ایل سی سی اے گراؤنڈ کے درمیان قائم دیوار کو ہٹانے کا کام شروع کر دیا گیا ہے۔ منصوبے کے مطابق ایل سی سی اے گراؤنڈ میں جدید سہولتوں پر مشتمل نیا پویلین تعمیر کیا جائے گا، جبکہ گراؤنڈ کے نکاسی آب کے نظام کو بھی جدید بنایا جائے گا۔ذرائع کا کہنا ہے کہ نیشنل کرکٹ اکیڈمی کی توسیع بھی کی جائے گی، جہاں قومی کھلاڑیوں کے لیے جدید جم، سوئمنگ پول اور تربیت و بحالی سے متعلق دیگر سہولیات فراہم کی جائیں گی۔اپ گریڈیشن کا کام مکمل ہونے کے بعد این سی اے اور ایل سی سی اے گراؤنڈ جدید عالمی معیار کی تربیتی سہولتوں کے حامل ہو جائیں گے، جس سے قومی کرکٹرز کی فٹنس، تیاری اور کارکردگی میں مزید بہتری آنے کی توقع ہے۔