لندن ( شوبز ڈیسک) پاکستانی ٹی وی اور فلم کی معروف اداکارہ ماہرہ خان نے کہا ہے کہ معاشرے میں دماغی امراض سے متعلق آگاہی بڑھانے کی شدید ضرورت ہے۔برٹش ایشین ٹرسٹ کی تقریب کے موقع پر میڈیا سے گفتگو کرتے ہوئے انہوں نے کہا کہ ذہنی صحت پر بات کرنا اب بھی بہت سے لوگوں کے لیے مشکل سمجھا جاتا ہے اور اس حوالے سے موجود جھجھک کو ختم کرنا ضروری ہے۔اداکارہ نے کہا کہ ذہنی بیماریاں بھی دیگر جسمانی امراض کی طرح ہیں اور ان کے بارے میں کھل کر بات ہونی چاہیے تاکہ متاثرہ افراد کو بہتر مدد مل سکے۔انہوں نے برطانیہ کے شاہ چارلس کی فلاحی سرگرمیوں میں شرکت کو بھی اہم قرار دیا۔ماہرہ خان نے معاشرے میں بڑھتے ہوئے ہراسانی اور تشدد کے واقعات پر تشویش کا اظہار کرتے ہوئے کہا کہ ایسے رویوں کی حوصلہ شکنی اور ذمہ دار افراد کو مثال بنا کر سزا دینا ضروری ہے تاکہ معاشرتی رویوں میں مثبت تبدیلی لائی جا سکے۔
