لاہور ( سپورٹس ڈیسک)ویڈیو اسٹریمنگ پلیٹ فارم نیٹ فلکس نے 2030ء میں مراکش اور پرتگال کی مشترکہ میزبانی میں ہونے والے فٹبال ورلڈ کپ کی اسپین میں نشریات کے حقوق حاصل کرلیے ہیں۔یہ پہلا موقع ہے کہ مقبول اسٹریمنگ سروس نے مردوں کے فٹبال ورلڈ کپ کے نشریاتی حقوق اپنے نام کیے ہیں۔امریکی سبسکرپشن سروس نیٹ فلکس کے پاس پہلے ہی 2027ء اور 2031ء میں ہونے والے خواتین کے فٹبال ورلڈ کپ کی عالمی سطح پر خصوصی نشریات کے حقوق موجود ہیں۔معاہدے کے تحت نیٹ فلکس اسپین اور انڈورا کے ناظرین کو آئندہ مردوں کے ورلڈ کپ کے تمام 104 میچز دکھائے گا۔ اسپین میں ہر روز میچوں کے انعقاد کے دوران ایک مقابلہ مفت نشر کرنے کا انتظام بھی کیا جائے گا۔اس کے علاوہ میچوں کا ایک منتخب مجموعہ اسپین کے ایک مفت ٹیلی وژن چینل پر بھی دکھایا جائے گا۔ اس میں اسپین کی قومی ٹیم کے تمام میچز، دونوں سیمی فائنلز اور فائنل شامل ہوں گے۔دوسری جانب برطانیہ میں فٹبال ورلڈ کپ کو اب بھی حکومت کی جانب سے اہم قومی کھیلوں کے مقابلوں کی فہرست میں شامل ہونے کا تحفظ حاصل ہے۔ اس ضابطے کے تحت ورلڈ کپ کی نشریات صرف روایتی ٹیلی وژن نیٹ ورکس کے ذریعے ہی کی جا سکتی ہیں۔فیفا کے سیکریٹری جنرل میٹیاس گرافشٹروم نے اس حوالے سے کہا کہ 2026ء اور 2030ء کے توسیع شدہ ورلڈ کپ دنیا بھر کے فٹبال شائقین کے لیے یادگار ایونٹس ثابت ہوں گے۔
