کرکٹ کا نیا ٹیسٹ ٹوئنٹی فارمیٹ متعارف، لڑکے اور لڑکیاں ایک ٹیم میں کھیلیں گے

لاہور ( سپورٹس ڈیسک) کرکٹ میں ایک نئے اور منفرد فارمیٹ ’’ٹیسٹ ٹوئنٹی‘‘ کا آغاز ہونے جا رہا ہے، جس میں لڑکے اور لڑکیاں ایک ہی ٹیم کا حصہ ہوں گے اور الگ الگ اننگز کھیلنے کے باوجود دونوں کا اسکور ٹیم کے مجموعی نتیجے میں شامل کیا جائے گا۔یہ منفرد ٹورنامنٹ 14 سے 29 نومبر 2026ء تک سری لنکا کے شہر کولمبو میں منعقد ہوگا، جس میں نوجوان کرکٹرز اپنی صلاحیتوں کا مظاہرہ کریں گے۔منتظمین کے مطابق، مقابلے میں 13 سے 21 سال کی عمر کے 160 نوجوان کھلاڑی شرکت کریں گے، جنہیں چار براعظمی ٹیموں میں تقسیم کیا جائے گا۔ ہر ٹیم میں 20 لڑکے اور 20 لڑکیاں شامل ہوں گے۔اس فارمیٹ کے تحت لڑکے اپنی نوعیت کے مقابلوں میں لڑکوں کے خلاف، جبکہ لڑکیاں لڑکیوں کے مدمقابل ہوں گی۔ تاہم، میچ کا فیصلہ دونوں کی کارکردگی سے حاصل ہونے والے مشترکہ اسکور کی بنیاد پر کیا جائے گا۔ایک میچ، دو اندازِ کرکٹٹیسٹ ٹوئنٹی فارمیٹ میں ہر میچ 80 اوورز پر مشتمل ہوگا۔ اس میں پہلے 40 اوورز دن کے وقت سرخ گیند اور روایتی سفید لباس میں کھیلے جائیں گے، جبکہ باقی 40 اوورز فلڈ لائٹس میں سفید گیند اور رنگین لباس کے ساتھ ہوں گے۔اس طرح نئے فارمیٹ میں روایتی ٹیسٹ کرکٹ اور محدود اوورز کی کرکٹ کے مختلف انداز یکجا کرنے کی کوشش کی گئی ہے۔کرکٹ کے نامور کھلاڑی مشاورتی بورڈ میں شاملٹورنامنٹ کے مشاورتی بورڈ میں جنوبی افریقا کے سابق کپتان اے بی ڈی ویلیئرز، آسٹریلیا کے سابق بلے باز میتھیو ہیڈن اور ویسٹ انڈیز کے سابق کپتان کلائیو لائیڈ شامل ہیں۔بھارتی کرکٹر ویرات کوہلی کے بچپن کے کوچ راجکمار شرما عالمی سلیکشن کمیٹی کی سربراہی کریں گے۔کولمبو کے سنہالیز اسپورٹس کلب میں منعقد ہونے والے اس ایونٹ کا فائنل 29 نومبر کو کھیلا جائے گا، جبکہ تمام میچز سونی اسپورٹس نیٹ ورک پر براہِ راست نشر کیے جانے کی توقع ہے۔کرکٹ کے اس نئے تجربے میں لڑکوں اور لڑکیوں کی الگ الگ کارکردگی کو ایک مشترکہ ٹیم کے نتیجے سے جوڑنے کی کوشش کی گئی ہے۔ اب دیکھنا یہ ہے کہ یہ فارمیٹ شائقین اور نوجوان کھلاڑیوں میں کتنی مقبولیت حاصل کرتا ہے۔