کراچی (شوبز ڈیسک) پاکستان کی معروف مارننگ شو میزبان ندا یاسر اور اداکار و ہدایتکار یاسر نواز کی 21 سالہ بیٹی صلہ یاسر نے ڈیجیٹل کانٹینٹ کریئٹر کے طور پر اپنے سفر کا آغاز کردیا۔صلہ یاسر نے انسٹاگرام پر اپنی پہلی ’’گیٹ ریڈی ود می‘‘ ویڈیو جاری کی، جس میں انہوں نے مداحوں کو اپنی شخصیت اور پسند ناپسند سے متعلق دلچسپ معلومات دیں۔انہوں نے بتایا کہ رواں برس جولائی میں برطانیہ سے فیشن ڈیزائننگ میں گریجویشن مکمل کرنے کے بعد پاکستان واپس آئی ہیں اور اب فارغ وقت میں فیشن، میک اپ اور اسٹائلنگ سے متعلق مواد تیار کرنا چاہتی ہیں۔صلہ کے مطابق انہیں دوستوں کے ساتھ وقت گزارنے، سونے، سفر اور خریداری کا شوق ہے، جبکہ موسیقی میں ان کی پسند بھی متنوع ہے اور وہ کاوش سے لے کر ہارڈ راک تک موسیقی سنتی ہیں۔انہوں نے مزاحیہ انداز میں کہا کہ اپنے شہر میں وہ زیادہ تیار نہیں ہوتیں، تاہم سفر کے دوران ان کا انداز ایسا ہوتا ہے جو ریڈ کارپٹ پر موجود مشہور شخصیات کو بھی ٹکر دے سکتا ہے۔صلہ یاسر نے فیشن، میک اپ اور اسٹائلنگ میں دلچسپی رکھنے والوں کو اپنا اکاؤنٹ فالو کرنے کی دعوت دیتے ہوئے واضح کیا کہ آئندہ ان کا مواد بھی انہی موضوعات پر مرکوز ہوگا۔ادھر ندا یاسر نے بھی بیٹی کے نئے سفر کی حوصلہ افزائی کی اور ان کی پوسٹ پر ’’لو یو‘‘ لکھ کر محبت کا اظہار کیا۔ صلہ کی پہلی ویڈیو کو سوشل میڈیا صارفین کی جانب سے بھی مثبت ردعمل مل رہا ہے۔
