نمرہ خان کی ازدواجی زندگی کی افواہیں، ساتھی اداکارائیں حمایت میں سامنے آگئیں

لاہور ( شوبز ڈیسک) پاکستانی اداکارہ نمرہ خان کی ازدواجی زندگی سے متعلق گردش کرنے والی افواہوں کے بعد ساتھی فنکاراؤں نے ان کی حمایت شروع کردی۔اداکارہ منشا پاشا نے نمرہ خان کے شوہر زین حامد کی مبہم سماجی رابطوں کی پوسٹ پر سخت ردعمل دیتے ہوئے کہا کہ زین جیسے معمولی مردوں کا اس طرح کا رویہ ہمیشہ ایک پیچیدہ مسئلہ بنا رہے گا۔منشا پاشا کے بیان کے بعد یہ معاملہ سماجی رابطوں کی ویب سائٹس پر بھی زیر بحث آگیا۔ اس سے قبل مارننگ شو کی میزبان ندا یاسر نے بھی نمرہ خان کی حمایت میں پیغام جاری کیا تھا۔اداکارہ مومل خالد نے بھی نمرہ خان سے اظہار یکجہتی کرتے ہوئے کہا کہ وہ جس صورتحال سے گزر رہی ہیں، اس پر انہیں دکھ ہے۔ انہوں نے نمرہ کو ذمہ دار ٹھہرانے والوں کو تنقید کا نشانہ بنایا اور لوگوں سے اپیل کی کہ فیصلہ سنانے کے بجائے ہمدردی کا مظاہرہ کریں۔