لاہور( شوبز ڈیسک) ماضی کی معروف پاکستانی فلم اسٹار نشو نے بزرگ افراد کو جائیداد اور مالی معاملات سے متعلق اہم مشورہ دیتے ہوئے کہا ہے کہ بڑھاپے میں اپنی صحت اور دولت کا خصوصی خیال رکھنا چاہیے۔نشو بیگم اپنے دور کی مقبول اداکاراؤں میں شمار ہوتی ہیں، جنہوں نے رنگیلا، بازی، انسان اور گدھا اور سوسائٹی گرل سمیت متعدد کامیاب فلموں میں اداکاری کے جوہر دکھائے۔ وہ حالیہ برسوں میں سوشل میڈیا پر بھی فعال ہیں اور یوٹیوب و ٹک ٹاک کے ذریعے مداحوں سے رابطے میں رہتی ہیں۔ وہ معروف اداکارہ صاحبہ افضل کی والدہ بھی ہیں۔حال ہی میں نشو نے میزبان یازی کے پوڈکاسٹ دی یازیسٹک شو میں شرکت کی، جہاں انہوں نے اپنی زندگی کے تجربات کی بنیاد پر بزرگ والدین کو اہم مشورے دیے۔نشو کا کہنا تھا کہ عمر کے آخری حصے میں انسان کو اپنی صحت اور مالی معاملات پر مکمل اختیار برقرار رکھنا چاہیے، کیونکہ بعض اوقات قریبی رشتے داروں کے رویے بھی تبدیل ہو سکتے ہیں۔انہوں نے کہا کہ بزرگ افراد کو اپنی جائیداد زندگی میں ہی بچوں کے نام منتقل نہیں کرنی چاہیے۔ ان کے مطابق جو کچھ والدین کے پاس ہوتا ہے وہ ان کے انتقال کے بعد بچوں کو وراثت میں مل جاتا ہے، لیکن اگر زندگی میں ہی سب کچھ دے دیا جائے تو بعض حالات میں والدین کی اہمیت کم ہو سکتی ہے۔نشو نے بزرگ افراد کو مشورہ دیا کہ وہ اپنی ضروریات، عزتِ نفس اور مستقبل کے تحفظ کو مدنظر رکھتے ہوئے مالی فیصلے کریں۔
