آبنائے ہرمز سے سپلائی متاثر ہونے کے خدشات، خام تیل 78 ڈالر فی بیرل سے تجاوز کر گیا

اسلام آباد( کامرس ڈیسک) امریکا اور ایران کے درمیان بڑھتی ہوئی کشیدگی کے باعث عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے۔میڈیا رپورٹس کے مطابق عالمی مارکیٹ میں تیل کی قیمتوں میں 3 فیصد سے زائد اضافہ ہوا، جبکہ برینٹ خام تیل کی قیمت 2.67 ڈالر یعنی 3.51 فیصد اضافے کے بعد 78.68 ڈالر فی بیرل تک پہنچ گئی۔ماہرین کا کہنا ہے کہ تیل کی قیمتوں میں اضافے کی بڑی وجہ یہ خدشہ ہے کہ جاری کشیدگی کے باعث آبنائے ہرمز کے ذریعے تیل کی ترسیل متاثر ہو سکتی ہے۔امریکی ادارہ توانائی اطلاعات کے مطابق تنازع سے قبل دنیا بھر میں سپلائی ہونے والے خام تیل کا تقریباً 20 فیصد حصہ آبنائے ہرمز کے راستے منتقل کیا جاتا تھا، اسی وجہ سے عالمی منڈی اس اہم بحری گزرگاہ کی صورتحال پر گہری نظر رکھے ہوئے ہے۔واضح رہے کہ امریکی فوج نے ایران کے خلاف مزید کارروائیوں کا آغاز کر دیا ہے۔امریکی سینٹرل کمانڈ (سینٹکام) نے اپنے بیان میں کہا ہے کہ امریکی افواج نے ایران کے خلاف نئے حملے شروع کیے ہیں۔سینٹکام کے مطابق ان کارروائیوں کا مقصد آبنائے ہرمز سے گزرنے والے شہری اور تجارتی بحری جہازوں پر حملوں کی ایران کی صلاحیت کو کمزور کرنا ہے۔