اسلام آباد( پاکستان خبر) وفاقی وزیرِ صحت مصطفیٰ کمال کی ہدایت پر وفاق کے زیر انتظام تمام سرکاری اسپتالوں میں فوری طور پر آگ سے بچاؤ کے حفاظتی معائنے شروع کرنے کا حکم دے دیا گیا ہے۔وزارتِ صحت کے ترجمان کے مطابق اس سلسلے میں باضابطہ مراسلہ جاری کردیا گیا ہے۔ ماہر اور مجاز فائر سیفٹی کمپنی کے ذریعے اسپتالوں کا تفصیلی معائنہ کیا جائے گا، جس میں فائر الارم، آگ بجھانے کے آلات، ہنگامی دروازوں اور انخلا کے راستوں کا جائزہ لیا جائے گا۔معائنے کے دوران بجلی کے نظام سمیت آگ لگنے کے ممکنہ اسباب، ہنگامی ردعمل کے انتظامات اور کسی حادثے کی صورت میں اسپتال کے عملے کی تیاری بھی جانچی جائے گی۔وزارتِ صحت نے ہدایت کی ہے کہ معائنے کے دوران سامنے آنے والی ایسی خامیوں کو ترجیحی بنیادوں پر دور کیا جائے جو انسانی جان یا املاک کے لیے فوری خطرہ بن سکتی ہیں۔تمام اسپتالوں کو ہدایت دی گئی ہے کہ معائنے کے آغاز، متعلقہ فائر سیفٹی کمپنی اور عمل کی تکمیل کی متوقع تاریخ سے وزارتِ صحت کو آگاہ کیا جائے۔اسلام آباد ہیلتھ کیئر ریگولیٹری اتھارٹی کو بھی سرکاری و نجی طبی اداروں میں فائر سیفٹی آڈٹ شروع کرانے اور اس کی نگرانی کی ذمہ داری سونپی گئی ہے۔ اتھارٹی جامع رپورٹ وزارتِ صحت کو پیش کرے گی، جس میں آڈٹ مکمل کرنے والے اور تاحال زیرِ التوا اداروں کی تفصیلات شامل ہوں گی۔
