آسکر ایوارڈز 2029 میں نئے مقام اور ڈیجیٹل نشر کے ساتھ شائقین کے لیے کھلیں گے

لاہور( شوبز ڈیسک) فلمی دنیا کے سب سے بڑے ایوارڈز آسکر ایوارڈز 2029 سے ایک نئے دور میں داخل ہونے جا رہے ہیں، جس میں تقریب کے مقام اور نشریاتی نظام میں نمایاں تبدیلیاں متوقع ہیں۔غیر ملکی میڈیا رپورٹس کے مطابق کئی برسوں سے یہ تقریب ڈولبی تھیٹر، لاس اینجلس میں منعقد ہوتی رہی ہے، تاہم 2029 میں اسے شہر کے ڈاؤن ٹاؤن میں واقع ایل اے لائیو منتقل کیا جائے گا، جو ایک وسیع اور جدید مقام ہے۔نئی جگہ پر ریڈ کارپٹ، مرکزی اسٹیج، میڈیا کوریج اور آفٹر پارٹیز سب ایک ہی مقام پر منعقد کی جا سکیں گی، جس سے تقریب کو زیادہ منظم اور شاندار بنایا جا سکے گا۔ موجودہ تھیٹر، جو اس وقت پیکاک تھیٹر کہلاتا ہے، ممکنہ طور پر مستقبل میں نیا نام لے سکتا ہے۔اس تبدیلی کے تحت شائقین اور مہمانوں کے لیے بھی زیادہ جگہ مختص کی جائے گی، جس سے زیادہ افراد کو اس پرتعیش تقریب کو قریب سے دیکھنے کا موقع ملے گا۔مزید برآں، 2029 سے آسکر ایوارڈز کو ڈیجیٹل پلیٹ فارم پر بھی منتقل کیا جا رہا ہے۔ تقریب دنیا بھر میں مفت یوٹیوب پر نشر کی جائے گی، جبکہ امریکا میں یہ یوٹیوب ٹی وی پر بھی دستیاب ہوگی۔