پاکستان اور چینی کمپنی کے درمیان ڈیجیٹل انفرااسٹرکچر اور اے آئی تعاون کا معاہدہ

اسلام آباد ( ویب ڈیسک) نیشنل ٹیلی کمیونیکیشن کارپوریشن اور چین کی کمپنی سن شائن انرجی ٹیکنالوجی کے درمیان باہمی تعاون کے معاہدے پر دستخط کیے گئے ہیں۔معاہدے کا بنیادی مقصد پاکستان میں جدید ڈیجیٹل انفرااسٹرکچر کی ترقی، مصنوعی ذہانت کی صلاحیتوں میں اضافہ اور بگ ڈیٹا اینالیٹکس کے شعبے کو فروغ دینا ہے۔اس موقع پر وفاقی وزیر برائے انفارمیشن ٹیکنالوجی شزہ فاطمہ خواجہ نے کہا کہ حکومت ملک میں ڈیجیٹل رابطہ کاری کو جدید خطوط پر استوار کر رہی ہے اور ہر شعبے میں مصنوعی ذہانت کا کردار تیزی سے بڑھ رہا ہے۔انہوں نے کہا کہ حکومت کا ہدف ڈیجیٹل گورننس اور ڈیجیٹل معیشت کو مضبوط بنانا ہے، جبکہ ڈیٹا پر مبنی ترقی کو پائیدار ترقی کی بنیاد قرار دیا جا رہا ہے۔وفاقی وزیر کے مطابق اس منصوبے کے تحت پاکستان میں ایسے ڈیجیٹل پبلک انفرااسٹرکچر کی تیاری کی جائے گی جو مصنوعی ذہانت اور بگ ڈیٹا اینالیٹکس کی جدید صلاحیتوں سے لیس ہوگا۔حکام کے مطابق یہ معاہدہ ملک میں ٹیکنالوجی کے شعبے میں تعاون اور جدت کے نئے مواقع پیدا کرنے میں مددگار ثابت ہوگا۔