لاہور ( سپورٹس ڈیسک)قومی کرکٹ ٹیم کے سابق کپتان محمد یوسف کا کہنا ہے کہ پاکستان کرکٹ کی ساکھ بحال کرنے کا واحد راستہ میدان میں کارکردگی اور کامیابی ہے۔قومی کرکٹ ٹیم کی انگلینڈ کے خلاف 2 ٹیسٹ میچوں میں شکست کے بعد پیدا ہونے والی صورتحال پر اپنے بیان میں محمد یوسف نے کہا کہ کھلاڑیوں اور کوچنگ اسٹاف کو واپس بلانے کا معاملہ صرف کارکردگی تک محدود نہیں۔انہوں نے کہا کہ ہم ظہیر عباس، جاوید میانداد، انضمام الحق یا سعید انور جیسے لیجنڈز کو متبادل کے طور پر نہیں بھیج رہے، یہ سب پاکستان کرکٹ میں اختلافات، اندرونی خلفشار اور تنازعات کی عکاسی کرتا ہے۔محمد یوسف کا کہنا تھا کہ مسلسل فتوحات اور مثبت نتائج ہی شور ختم کرسکتے ہیں۔ 1992 کے ورلڈ کپ کے بعد سے پاکستان کرکٹ میں عدم استحکام بار بار دہرایا جارہا ہے اور ان معاملات کی وجہ سے کھیل سے توجہ ہٹ گئی ہے۔سابق کپتان نے کہا کہ پاکستان کرکٹ کو میدان پر توجہ مرکوز کرنی چاہیے، بورڈ روم پر نہیں۔ مسلسل فتوحات اور مثبت نتائج ہی شور ختم کرسکتے ہیں، جبکہ پاکستان کرکٹ کی ساکھ بحال کرنے کا واحد راستہ میدان میں کارکردگی اور کامیابی ہے۔
