سینٹرل ایشین والی بال چیمپئن شپ، پاکستان کی بنگلادیش کے خلاف شاندار فتح

اسلام آباد( سپورٹس ڈیسک) پاکستان نے سینٹرل ایشین والی بال چیمپئن شپ میں اپنی دوسری کامیابی حاصل کرتے ہوئے بنگلادیش کو مسلسل تین سیٹس میں شکست دے دی۔اسلام آباد میں جاری ایونٹ کے دوسرے میچ میں میزبان قومی ٹیم نے شاندار کارکردگی کا مظاہرہ کرتے ہوئے بنگلادیشی ٹیم کو مقابلے میں حاوی ہونے کا کوئی موقع نہ دیا۔پاکستان نے تینوں اسٹریٹ سیٹس میں کامیابی حاصل کی، قومی ٹیم کی فتح کا اسکور 25-22، 25-17 اور 25-16 رہا۔ اس کامیابی کے ساتھ پاکستان نے ٹورنامنٹ میں اپنی دوسری فتح حاصل کر لی۔چیمپئن شپ کے دوسرے روز کھیلے گئے دیگر مقابلوں میں سری لنکا نے نیپال جبکہ ازبکستان نے قازقستان کو شکست دی۔ دونوں میچز کا فیصلہ پانچ، پانچ سیٹس کے سخت مقابلے کے بعد ہوا۔سینٹرل ایشین والی بال چیمپئن شپ پاکستان اسپورٹس بورڈ کے لیاقت جمنازیم اسلام آباد میں جاری ہے، جو 29 جولائی تک جاری رہے گی۔