لاہور( سپورٹس ڈیسک) پاکستان فٹبال فیڈریشن (پی ایف ایف) نے قومی مردوں کی فٹبال ٹیم کی رواں سال ہونے والے افتتاحی فیفا آسیان کپ میں شرکت کی باضابطہ تصدیق کر دی ہے، جو پاکستان فٹبال کے لیے ایک تاریخی موقع قرار دیا جا رہا ہے۔پی ایف ایف کے مطابق قومی مینز فٹبال ٹیم پہلی مرتبہ کسی فیفا ایونٹ میں شرکت کرے گی، جہاں اسے عالمی سطح کی مضبوط ٹیموں کے خلاف کھیلنے کا موقع ملے گا۔فیفا آسیان کپ رواں سال ستمبر اور اکتوبر میں انڈونیشیا میں منعقد ہوگا۔ پاکستان اس ٹورنامنٹ کے ٹاپ ٹائر میں شامل ہوگا، جہاں اس کا مقابلہ بھارت، ملائیشیا، سنگاپور، انڈونیشیا، فلپائن اور تھائی لینڈ جیسی ٹیموں سے متوقع ہے۔پاکستان ان تین ممالک میں شامل ہے جنہیں خصوصی دعوت پر اس ایونٹ کا حصہ بنایا گیا ہے۔ ٹورنامنٹ میں شریک ٹیموں کو دو گروپس میں تقسیم کیا جائے گا۔پی ایف ایف کے صدر سید محسن گیلانی نے کہا کہ قومی ویمنز ٹیم کی فیفا سیریز میں شرکت کے بعد اب مردوں کی ٹیم بھی اپنے پہلے فیفا ایونٹ میں حصہ لے گی، جو پاکستان فٹبال کے لیے ایک اہم سنگ میل ہے۔انہوں نے کہا کہ یہ ٹورنامنٹ قومی ٹیم کو مضبوط حریفوں کے خلاف صلاحیتوں کے اظہار اور عالمی سطح پر تجربہ حاصل کرنے کا بہترین موقع فراہم کرے گا۔واضح رہے کہ پاکستان کی فیفا آسیان کپ میں شرکت کی خبر سب سے پہلے 13 جون کو سامنے آئی تھی، جس کی اب پاکستان فٹبال فیڈریشن نے باضابطہ طور پر تصدیق کر دی ہے۔
