آئی ٹی یو انڈیکس 2026 میں پاکستان کی نمایاں بہتری، ڈیجیٹل ترقی میں 20 فیصد اضافہ

اسلام آباد( ویب ڈیسک) پاکستان نے آئی ٹی یو آئی سی ٹی ڈیولپمنٹ انڈیکس 2026 میں نمایاں پیش رفت حاصل کرتے ہوئے اپنی ڈیجیٹل کارکردگی میں واضح بہتری دکھائی ہے، جہاں ملک کا مجموعی اسکور 56.4 سے بڑھ کر 67.7 تک پہنچ گیا ہے، جو تقریباً 20 فیصد اضافہ ظاہر کرتا ہے۔رپورٹ کے مطابق کنیکٹیویٹی کے شعبے میں پاکستان نے اہم پیش رفت کرتے ہوئے 22.8 پوائنٹس کا اضافہ حاصل کیا، جس کے بعد میننگ فل کنیکٹیویٹی اسکور 79 تک جا پہنچا ہے۔ اسی طرح ملک کی عالمی درجہ بندی میں بھی تقریباً 27 درجے بہتری ریکارڈ کی گئی ہے۔ماہرین کے مطابق آئی ٹی یو انڈیکس میں یہ بہتری پاکستان کے ڈیجیٹل سفر میں ایک اہم سنگ میل کی حیثیت رکھتی ہے اور اس سے ملک میں ٹیکنالوجی کے شعبے کی ترقی کی رفتار کا اندازہ ہوتا ہے۔وفاقی وزیر برائے آئی ٹی و ٹیلی کمیونیکیشن شزہ فاطمہ خواجہ نے اس پیش رفت کو سراہتے ہوئے کہا ہے کہ وزیراعظم شہباز شریف کی قیادت میں حکومت آئی ٹی اور ٹیلی کام کے شعبے کو خصوصی ترجیح دے رہی ہے۔انہوں نے کہا کہ بہتر کنیکٹیویٹی کے باعث نوجوانوں، طلبہ، فری لانسرز اور کاروباری طبقے کے لیے نئے مواقع پیدا ہوں گے، جبکہ حکومت ملک بھر میں سستی، معیاری اور قابلِ اعتماد ڈیجیٹل سہولیات کی فراہمی کے لیے اقدامات جاری رکھے ہوئے ہے۔وفاقی وزیر کے مطابق اس انڈیکس میں بہتری نہ صرف ملکی ڈیجیٹل ترقی کی عکاس ہے بلکہ یہ غیر ملکی سرمایہ کاروں اور ٹیکنالوجی کمپنیوں کے لیے بھی ایک مثبت اور حوصلہ افزا پیغام ہے۔