اسلام آباد( پاکستان خبر) پاکستان اور امریکا کے درمیان باہمی تجارت کے معاہدے سے متعلق مذاکرات 9 اور 10 جولائی کو واشنگٹن ڈی سی میں منعقد ہوئے۔ترجمان دفتر خارجہ طاہر حسین اندرابی کے مطابق مذاکرات خوشگوار ماحول میں ہوئے، جن میں دونوں ممالک کے نمائندوں نے اختلافی معاملات کے حل اور مشترکہ نکات پر اتفاق رائے پیدا کرنے کے لیے اہم پیش رفت کی۔انہوں نے کہا کہ فریقین نے کوشش کی کہ تجارتی معاہدے کو جلد حتمی شکل دی جا سکے۔مذاکرات میں پاکستانی وفد کی قیادت کرنے والے سیکرٹری تجارت جواد پال نے بات چیت کو مثبت قرار دیتے ہوئے کہا کہ مذاکرات کے دوران اہم پیش رفت سامنے آئی ہے اور دونوں ممالک کے درمیان تجارتی معاہدے کے حوالے سے نمایاں پیش رفت حاصل ہوئی ہے۔
