لاہور ( سپورٹس ڈیسک)ایشین گیمز 2026 میں پاکستان نے اپنا پہلا تمغہ حاصل کرلیا، کراچی سے تعلق رکھنے والے عاصم خان نے مکسڈ مارشل آرٹس میں کانسی کا تمغہ اپنے نام کرلیا۔عاصم خان کو سیمی فائنل میں شکست کا سامنا کرنا پڑا، تاہم مقابلے کے قواعد کے تحت وہ کانسی کے تمغے کے حقدار قرار پائے۔ ان کی تمغہ تقریب کل ہوگی جبکہ عاصم خان بدھ کو کراچی واپس پہنچیں گے۔گیمز میں ٹیم لیڈر دلاور خان نے کہا کہ عاصم خان نے پاکستان کیلئے تمغوں کا آغاز کردیا ہے اور امید ہے کہ دیگر مقابلوں میں بھی قومی کھلاڑی مزید تمغے حاصل کریں گے۔ ان کے مطابق عاصم خان کا یہ ایشین گیمز میں پہلا تمغہ ہے، جبکہ وہ اس سے قبل عالمی کانسی اور ایشیائی چاندی کا تمغہ بھی جیت چکے ہیں۔دوسری جانب دیگر پاکستانی کھلاڑیوں کی کارکردگی متاثر کن نہ رہی۔ پچاس میٹر آزادانہ تیراکی میں حمزہ آصف اپنی ہیٹ میں دوسرے نمبر پر رہے، تاہم مجموعی درجہ بندی میں 30ویں پوزیشن حاصل کی۔مکسڈ ٹرائی تھلون میں پاکستانی ٹیم آخری نمبر پر رہی اور مقررہ وقت میں ایونٹ مکمل نہ ہونے کے باعث نتیجہ ’’این ڈی ایف‘‘ قرار دیا گیا۔ سافٹ ٹینس مکسڈ ڈبلز میں پاکستان کو چائنیز تائی پے، کوریا اور فلپائن کے ہاتھوں شکست ہوئی، جبکہ ٹیبل ٹینس خواتین کے گروپ مقابلے میں روایتی حریف بھارت نے پاکستان کو ہرا دیا۔
