پاکستانی فنکاروں کا اردن میں فلاحی مشن، فلسطینی بچوں اور خاندانوں سے ملاقاتیں

کراچی( شو بز ڈیسک)پاکستان کے معروف شوبز فنکاروں نے اردن میں پانچ روزہ فلاحی مشن کے دوران فلسطینی خاندانوں کی مدد کی اور زیرِ علاج زخمی فلسطینی بچوں اور ان کے اہلِ خانہ سے ملاقاتیں کیں۔اس مشن میں جاوید شیخ، صبا حمید، شگفتہ اعجاز، خالد انعم، کبریٰ خان، گوہر رشید، احمد علی اکبر، علی خان اور نبیل ظفر سمیت متعدد فنکاروں نے شرکت کی۔برطانیہ میں رجسٹرڈ فلاحی تنظیم ایس کے ٹی ویلفیئر کے تعاون سے 29 ستمبر سے 3 اکتوبر تک جاری رہنے والی امدادی سرگرمیوں کے دوران فنکاروں نے غزہ سے بے گھر ہونے والے 500 سے زائد خاندانوں میں راشن تقسیم کیا۔فنکاروں نے اردن میں زیرِ علاج فلسطینی بچوں اور ان کے اہلِ خانہ سے ملاقات کرکے ان کی خیریت دریافت کی۔ اداکار خالد انعم کے مطابق ان خاندانوں میں جنگ کے دوران زخمی ہونے والے بچوں کے علاوہ کینسر اور دل کی بیماریوں میں مبتلا بچے بھی شامل تھے۔فلاحی تنظیم نے زیرِ علاج بچوں کے لیے کھیلوں، تفریحی سرگرمیوں اور کھانے کا خصوصی انتظام بھی کیا۔ فنکاروں نے اپنے اس فلاحی مشن کے دوران امدادی سرگرمیوں کی تصاویر اور ویڈیوز سوشل میڈیا پر بھی شیئر کیں۔