اسلام آباد( کامرس ڈیسک)پاکستانی فری لانسرز نے ڈیجیٹل معیشت میں اہم کامیابی حاصل کرتے ہوئے مالی سال 2025-26 کے دوران ریکارڈ 1 ارب 76 کروڑ ڈالر کا زرمبادلہ کما لیا۔سرکاری اعداد و شمار کے مطابق گزشتہ مالی سال کے مقابلے میں فری لانسرز کی برآمدی آمدن میں 78 فیصد کا نمایاں اضافہ ریکارڈ کیا گیا۔اعداد و شمار کے مطابق صرف جون 2026 میں پاکستانی فری لانسرز نے 16 کروڑ 40 لاکھ ڈالر کی آمدن حاصل کی، جو گزشتہ سال کے اسی عرصے کے مقابلے میں 69 فیصد زیادہ ہے۔رپورٹ کے مطابق مالی سال 2024-25 میں فری لانسرز کی برآمدی آمدن 98 کروڑ 50 لاکھ ڈالر رہی، جبکہ مالی سال 2023-24 میں یہ آمدن 50 کروڑ 50 لاکھ ڈالر اور مالی سال 2022-23 میں 36 کروڑ 40 لاکھ ڈالر ریکارڈ کی گئی تھی۔ماہرین کے مطابق فری لانسنگ شعبے میں تیزی سے ہونے والی ترقی پاکستان کی ڈیجیٹل معیشت کے فروغ اور نوجوانوں کے لیے روزگار کے نئے مواقع پیدا ہونے کی نشاندہی کرتی ہے۔
