لاہور( شوبز ڈیسک)پاکستانی اداکار اور گلوکار ہارون شاہد نے کہا ہے کہ بین الاقوامی سطح پر پاکستان کے بارے میں جو تاثر پیش کیا جاتا ہے وہ حقیقت سے مختلف ہے اور ملک کے بارے میں منفی تصور کو درست نہیں سمجھا جا سکتا۔ایک پوڈکاسٹ میں گفتگو کرتے ہوئے انہوں نے پاکستان اور بھارت سے متعلق عالمی رائے پر اظہار خیال کیا اور کہا کہ بعض اوقات پاکستان کو ایسے ملک کے طور پر پیش کیا جاتا ہے جہاں ترقی اور وسائل کی کمی ہے، حالانکہ زمینی حقائق اس سے مختلف ہیں۔ہارون شاہد کے مطابق پاکستان میں انفراسٹرکچر، زرعی پیداوار اور شہری سہولیات موجود ہیں، اور ملک کو اس انداز میں دیکھنا درست نہیں جس طرح بعض بین الاقوامی میڈیا میں پیش کیا جاتا ہے۔انہوں نے کہا کہ بہت سے افراد پاکستان کے بارے میں منفی رائے رکھتے ہیں، تاہم اگر وہ خود آ کر حالات کا مشاہدہ کریں تو انہیں حقیقت مختلف نظر آئے گی۔
