تیل کی قیمتوں میں اضافے سے پاکستان کا درآمدی بل 16.86 ارب ڈالر تک پہنچ گیا

اسلام آباد( کامرس ڈیسک) مشرق وسطیٰ میں بڑھتی ہوئی کشیدگی کے باعث عالمی منڈی میں تیل کی قیمتوں میں غیر معمولی اضافے سے پاکستان کا پیٹرولیم مصنوعات کا درآمدی بل عالمی مالیاتی فنڈ (آئی ایم ایف) کے اندازوں سے تجاوز کر گیا۔سرکاری دستاویزات کے مطابق مالی سال 2025-26 میں پاکستان کا تیل درآمدی بل 16 ارب 86 کروڑ ڈالر تک پہنچ گیا، جو آئی ایم ایف کے ابتدائی تخمینے سے ایک ارب 58 کروڑ ڈالر زیادہ ہے۔آئی ایم ایف نے مالی سال 2026-27 کے لیے پاکستان کی تیل درآمدات کا تخمینہ 16 ارب 31 کروڑ ڈالر لگایا ہے، تاہم عالمی سطح پر تیل کی قیمتوں میں اضافے کے باعث درآمدی اخراجات میں نمایاں اضافہ ہوا۔رپورٹ کے مطابق تیل کی بلند قیمتوں نے نہ صرف ملکی درآمدی بل بڑھایا بلکہ عوام کو بھی پیٹرول اور ڈیزل کی بلند ترین قیمتوں کا سامنا کرنا پڑا۔دستاویزات کے مطابق 30 جون کو ختم ہونے والے مالی سال 2025-26 کے دوران پاکستان کی تیل درآمدات میں سالانہ بنیادوں پر 5.76 فیصد اضافہ ریکارڈ کیا گیا۔اقتصادی ماہرین کے مطابق عالمی توانائی بحران، خطے کی کشیدگی اور قیمتوں میں اتار چڑھاؤ پاکستان کے بیرونی ادائیگیوں کے دباؤ میں اضافے کی بڑی وجوہات میں شامل ہیں۔