لاہور( سپورٹس ڈیسک) پاکستان کرکٹ بورڈ نے قومی کرکٹرز کو مختلف غیر ملکی لیگز میں شرکت کے لیے این او سی جاری کردیئے۔پی سی بی نے حسن نواز، حنین شاہ، نسیم شاہ، عثمان خان، معاذ صداقت، صاحبزادہ فرحان، سفیان مقیم اور شاداب خان کو کیریبین پریمیئر لیگ (سی پی ایل) میں شرکت کی اجازت دے دی ہے۔ ان کھلاڑیوں کو 19 اگست سے 21 ستمبر تک این او سی دیے گئے ہیں۔اسپنر نعمان علی کو لنکا شائر کاؤنٹی کی جانب سے کھیلنے کے لیے 27 ستمبر تک اجازت ملی ہے، جبکہ وکٹ کیپر بیٹر محمد حارث کو 7 اگست سے 20 ستمبر تک سی پی ایل کے لیے این او سی جاری کیا گیا ہے۔مسٹری اسپنر عثمان طارق 8 اگست سے 18 ستمبر تک سی پی ایل میں ایکشن میں ہوں گے، جبکہ اسامہ میر کو 7 اگست سے 21 ستمبر تک لیگ میں شرکت کی اجازت دی گئی ہے۔
