گلوکارہ ٹیلر سوئفٹ کے کنسرٹ پر حملے کی منصوبہ بندی کرنے والے شخص کو 15 سال قید

نیویارک( شو بز ڈیسک) عالمی شہرت یافتہ گلوکارہ Taylor Swift کے کنسرٹ پر حملے کی منصوبہ بندی میں ملوث ایک شخص کو عدالت نے 15 سال قید کی سزا سنا دی۔غیر ملکی ذرائع ابلاغ کے مطابق 21 سالہ آسٹرین شہری نے عدالت میں دہشت گردی سے متعلق الزامات کا اعتراف کر لیا۔ ملزم کو 2024 میں گلوکارہ کے کنسرٹ سے ایک روز قبل گرفتار کیا گیا تھا۔عدالتی کارروائی کے دوران ملزم نے اعتراف کیا کہ وہ ایک بڑے حملے کی منصوبہ بندی میں شامل تھا۔ رپورٹ کے مطابق اس کے ایک ساتھی نے بھی بعض علاقوں میں حملوں کی منصوبہ بندی سے متعلق الزامات تسلیم کیے ہیں۔حکام کا کہنا ہے کہ بروقت کارروائی کے باعث ممکنہ خطرے کو ٹال دیا گیا اور عوامی اجتماع کی سکیورٹی یقینی بنائی گئی۔عدالت نے جرم کی سنگینی کو مدنظر رکھتے ہوئے ملزم کو 15 سال قید کی سزا سنائی، جبکہ واقعے کی مزید تفصیلات اور دیگر ممکنہ روابط کے حوالے سے تحقیقات جاری ہیں۔