لاہور( سپورٹس ڈیسک) قومی ویمنز کرکٹ ٹیم کی کپتان فاطمہ ثنا نے کہا ہے کہ تربیتی کیمپ میں زیادہ تر میچز لڑکوں کی ٹیموں کے ساتھ کھیلے، جس سے کھلاڑیوں کو بھرپور فائدہ حاصل ہوا۔لاہور میں میڈیا سے گفتگو کرتے ہوئے فاطمہ ثنا نے کہا کہ دی ہنڈرڈ میں شرکت کا تجربہ بہت اچھا رہا اور انہیں خوشی ہے کہ وہ اس ایونٹ میں کھیلنے والی پہلی پاکستانی کھلاڑی بنیں۔ انہوں نے کہا کہ اس ٹورنامنٹ میں پاکستان کا نام آنے پر انہیں فخر محسوس ہوا۔قومی کپتان نے امید ظاہر کی کہ مستقبل میں پاکستان کی مزید خواتین کھلاڑیوں کو بھی بیرون ملک ایسے مقابلوں میں کھیلنے کے مواقع ملیں گے۔فاطمہ ثنا نے کہا کہ انہوں نے ٹیم کی کھلاڑیوں کو واضح کیا ہے کہ بیٹنگ اور بولنگ کے ساتھ فیلڈنگ پر بھی بھرپور توجہ دینا ضروری ہے، کیونکہ کامیابی کے لیے تینوں شعبوں میں اچھی کارکردگی اہم ہے۔
