وزیراعظم کی گلگت بلتستان سولر منصوبے میں شفافیت اور بروقت تکمیل کی ہدایت

اسلام آباد( پاکستان خبر) وزیراعظم شہباز شریف نے گلگت بلتستان کے لیے 100 میگاواٹ شمسی توانائی منصوبے میں مکمل شفافیت یقینی بنانے اور اسے مقررہ مدت میں مکمل کرنے کی ہدایت کر دی۔وزیراعظم محمد شہباز شریف کی زیر صدارت گلگت بلتستان کے 100 میگاواٹ سولر منصوبے سے متعلق جائزہ اجلاس ہوا، جس میں منصوبے پر پیشرفت اور آئندہ مراحل کا تفصیلی جائزہ لیا گیا۔وزیراعظم نے کہا کہ ماحول دوست، صاف، سستی اور پائیدار توانائی کا فروغ قومی توانائی پالیسی کا اہم حصہ ہے۔ انہوں نے کہا کہ 100 میگاواٹ سولر منصوبہ وفاقی حکومت کی جانب سے گلگت بلتستان کے عوام کے لیے تحفہ ہے۔شہباز شریف نے پاور ڈویژن کو ہدایت کی کہ منصوبے کی تنصیب اور بروقت تکمیل کے لیے تمام ذمہ داریاں مؤثر انداز میں پوری کی جائیں۔ انہوں نے زور دیا کہ سولر منصوبے کی خریداری کے تمام مراحل میں شفافیت یقینی بنائی جائے اور تمام ادائیگیاں تیسرے فریق کی تصدیق کے بعد کی جائیں۔اجلاس کو دی گئی بریفنگ میں بتایا گیا کہ منصوبے کے تحت گلگت بلتستان کی 499 سرکاری عمارتوں کی چھتوں پر بیٹری اسٹوریج سمیت 18 میگاواٹ کے سولر سسٹمز دسمبر 2026 تک نصب کیے جائیں گے۔بریفنگ میں بتایا گیا کہ 82 میگاواٹ کے یوٹیلٹی اسکیل سولر منصوبے کا پی سی ون منظوری کے لیے ایکنک کو بھجوا دیا گیا ہے، جس سے تقریباً 13 لاکھ افراد مستفید ہوں گے۔حکام کے مطابق منصوبے کی تکمیل سے گلگت بلتستان میں بجلی کی فراہمی کے معیار میں بہتری آئے گی اور لوڈشیڈنگ کے خاتمے میں مدد ملے گی۔اجلاس میں وفاقی وزیر برائے پاور ڈویژن سردار اویس لغاری، وزیر مملکت برائے خزانہ و ریلوے بلال اظہر کیانی اور دیگر متعلقہ اعلیٰ حکام نے شرکت کی۔