پرکاش راج کی نیٹ پیپر لیک کے خلاف احتجاج میں شرکت، بھارتی حکومت پر سخت تنقید

بنگلور ( شوبز ڈیسک) بھارت کے میڈیکل اور ڈینٹل کورسز میں داخلے کے لیے ہونے والے نیٹ امتحان میں مبینہ پیپر لیک اور بے ضابطگیوں کے خلاف احتجاج میں جنوبی بھارت کے معروف اداکار پرکاش راج بھی شریک ہوئے۔یہ احتجاج بنگلور کے فریڈم پارک میں ’’کاکروچ جنتا پارٹی‘‘ کے بینر تلے منعقد ہوا، جس میں بڑی تعداد میں طلبہ اور نوجوانوں نے شرکت کی۔ احتجاج میں شامل شرکاء نے مبینہ بے ضابطگیوں پر مرکزی وزیرِ تعلیم دھرمیندر پردھان کے استعفے کا مطالبہ کیا۔شدید بارش کے باوجود مظاہرین بڑی تعداد میں جمع رہے اور اپنے تعلیمی مستقبل کے تحفظ کے لیے آواز بلند کرتے رہے۔ اس موقع پر سوشل میڈیا پر وائرل ویڈیوز میں پرکاش راج سماجی کارکن سونم وانگچک کے ساتھ موجود نظر آئے۔احتجاجی مظاہرے سے خطاب کرتے ہوئے پرکاش راج نے حکومت پر تنقید کرتے ہوئے کہا کہ منتخب نمائندوں کو اپنی ذمہ داریاں ادا کرنی چاہئیں، جبکہ نوجوان اپنے مستقبل کے لیے سڑکوں پر احتجاج کر رہے ہیں۔انہوں نے کہا کہ نوجوان اپنے خوابوں اور مستقبل کے تحفظ کے لیے جدوجہد کر رہے ہیں اور وہ اس پرامن احتجاج کی مکمل حمایت کرتے ہیں۔