پی ٹی اے کا غیر فعال سمز سے منسلک واٹس ایپ اکاؤنٹس بلاک کرنے کا فیصلہ

 اسلام آباد( ویب ڈیسک)پاکستان ٹیلی کمیونیکیشن اتھارٹی نے غیر فعال، منسوخ یا استعمال میں نہ رہنے والی سمز سے منسلک واٹس ایپ اکاؤنٹس کو بلاک کرنے کا فیصلہ کیا ہے۔پی ٹی اے نے صارفین کو ہدایت کی ہے کہ اپنے واٹس ایپ اکاؤنٹس کو موجودہ اور فعال موبائل نمبرز کے ساتھ منسلک رکھیں۔ موبائل نمبر تبدیل کرنے والے صارفین واٹس ایپ میں موجود نمبر تبدیل کرنے کا آپشن فوری استعمال کریں، جبکہ کارروائی کسی بھی وقت شروع کی جاسکتی ہے۔پی ٹی اے کے مطابق غیر فعال موبائل نمبرز سے منسلک بعض واٹس ایپ اکاؤنٹس فراڈ اور دیگر غیر قانونی سرگرمیوں کے لیے استعمال کیے جاتے ہیں۔اتھارٹی نے صارفین پر زور دیا ہے کہ وہ اپنی سمز کی موجودہ حیثیت کی تصدیق کریں اور اگر کوئی نمبر غیر فعال ہوچکا ہے تو بروقت ضروری اقدامات کریں۔پی ٹی اے کا کہنا ہے کہ واٹس ایپ پر موبائل نمبر بروقت تبدیل کرنے سے صارفین اپنے اکاؤنٹس کا کنٹرول برقرار رکھ سکیں گے اور غیر فعال نمبرز کے غلط استعمال سے بھی بچا جاسکے گا۔