اسلام آباد ( پاکستان خبر) پاکستان تحریک انصاف نے ایران اور امریکا کے درمیان دو ہفتوں کی جنگ بندی کو مثبت پیش رفت قرار دیتے ہوئے حکومتی سفارتی کردار کو سراہا ہے۔پارٹی کے جاری بیان میں کہا گیا ہے کہ جنگ کبھی مسائل کا حل نہیں ہوتی بلکہ مذاکرات ہی تنازعات کے حل کا مؤثر ذریعہ ہیں، تاریخ گواہ ہے کہ جنگیں صرف تباہی اور جانی نقصان کا سبب بنتی ہیں۔پی ٹی آئی نے اس پیش رفت کا خیرمقدم کرتے ہوئے امید ظاہر کی کہ معاہدے پر مکمل عملدرآمد ہوگا اور خطے میں پائیدار امن قائم ہوگا۔پارٹی رہنما سلمان اکرم راجا نے کہا کہ پاکستان بطور ریاست کسی ایک فرد پر منحصر نہیں بلکہ ایک آئینی نظام کے تحت کام کرتا ہے، انہوں نے خطے میں امن کے لیے پاکستان کی کوششوں کو قابل تعریف قرار دیا۔انہوں نے ایران کے دفاعی ردعمل کا ذکر کرتے ہوئے کہا کہ ایران نے جس انداز میں اپنا دفاع کیا وہ غیر معمولی تھا، جبکہ پاکستان کو بھی خطے میں امن کے لیے اپنا کردار ادا کرنا چاہیے۔دوسری جانب چیئرمین پی ٹی آئی بیرسٹر گوہر نے کہا کہ اگرچہ حکومت نے ثالثی کے عمل سے متعلق تفصیلات سے آگاہ نہیں کیا، تاہم جنگ بندی ایک خوش آئند اقدام ہے اور امید ہے کہ یہ مستقل امن کی بنیاد بنے گی۔انہوں نے مزید کہا کہ اس پیش رفت میں کردار ادا کرنے والے تمام فریقین قابل ستائش ہیں اور توقع ظاہر کی کہ اس کے اثرات کے نتیجے میں تیل کی قیمتوں میں بھی کمی آئے گی۔
