ممبئی( شو بز ڈیسک)بھارت کے شہر حیدرآباد کی نامپلی عدالت نے فلم ”پشپا ٹو“ کی اسکریننگ کے دوران تھیٹر میں ہونے والی بھگدڑ کے مقدمے میں اداکار الو ارجن کو 22 جون کو عدالت میں پیش ہونے کا حکم دیا ہے۔پولیس کے مطابق اس افسوسناک واقعے میں اداکار کو گیارہویں نمبر پر ملزم نامزد کیا گیا ہے، جبکہ سینما گھر کی انتظامیہ سمیت دیگر افراد کو پہلے دس نمبروں پر مقدمے میں شامل کیا گیا ہے۔حکام نے اس کیس میں تیزی سے کارروائی کرتے ہوئے اب تک 23 افراد کے خلاف چالان جمع کرا دیا ہے، جس کے بعد عدالت نے مجموعی طور پر 19 ملزمان کو سمن جاری کیے ہیں۔یہ واقعہ 4 دسمبر 2024 کو اس وقت پیش آیا جب فلم ”پشپا 2“ کے خصوصی شو کے دوران تھیٹر میں بھگدڑ مچ گئی، جس کے نتیجے میں ایک خاتون جان کی بازی ہار گئیں جبکہ ان کا بیٹا شدید زخمی ہوا۔اداکار کی قانونی ٹیم نے بھی عدالت میں پیشی کے حکم کی تصدیق کی ہے۔ دوسری جانب متاثرہ خاندان کی مدد کے لیے الو ارجن کے اہل خانہ نے بھی ان سے ملاقات کی ہے اور تعاون کی یقین دہانی کرائی ہے۔
