لاہور ( سپورٹس ڈیسک)جنوبی افریقا کے ممتاز فاسٹ بولر کگیسو ربادا نے پاکستان کے لیجنڈری فاسٹ بولر وسیم اکرم کی 1992ء کے عالمی کپ کے فائنل میں شاندار بولنگ کو اپنی کرکٹ کی یادگار ترین کارکردگیوں میں شامل قرار دیا ہے۔جوہانسبرگ میں عالمی کپ 2027ء سے متعلق ایک تقریب میں گفتگو کرتے ہوئے کگیسو ربادا نے کہا کہ انگلینڈ کے خلاف 1992ء کے فائنل میں وسیم اکرم کی بولنگ نے انہیں ہمیشہ متاثر کیا ہے اور وہ اس یادگار کارکردگی کو کبھی فراموش نہیں کرسکتے۔انہوں نے کہا کہ وہ بھی مستقبل میں وسیم اکرم جیسی یادگار کارکردگی پیش کرنے کے خواہش مند ہیں۔2027ء کا عالمی کپ جنوبی افریقا، زمبابوے اور نمیبیا مشترکہ طور پر منعقد کریں گے۔ ربادا نے اپنے ملک میں عالمی کپ کھیلنے کے حوالے سے کہا کہ ہوم گراؤنڈ پر عالمی کپ میں شرکت ایک منفرد تجربہ ہوگی، تاہم وہ اس موقع کو دباؤ کے بجائے آزادی کے طور پر دیکھتے ہیں۔
