کراچی (شوبز ڈیسک) پاکستان کے معروف یوٹیوبر رجب بٹ نے پہلی بار اپنی مجموعی دولت سے متعلق گفتگو کرتے ہوئے دعویٰ کیا ہے کہ وہ گزشتہ سال ارب پتی بن گئے تھے۔ایک پوڈکاسٹ میں گفتگو کے دوران میزبان نے رجب بٹ سے سوال کیا کہ آیا وہ کروڑ پتی ہیں یا ارب پتی؟ اس پر رجب بٹ نے پہلے میزبان سے پوچھا کہ کیا انہیں دونوں اصطلاحات کا فرق معلوم ہے، جس کے جواب میں ہاں ملنے پر انہوں نے کہا کہ الحمدللہ وہ گزشتہ سال ارب پتی بن گئے تھے۔رجب بٹ نے بتایا کہ ان کی مجموعی دولت 100 کروڑ پاکستانی روپے سے تجاوز کر چکی ہے اور وہ اس کامیابی پر اللہ تعالیٰ کا شکر ادا کرتے ہیں۔انہوں نے کہا کہ یہ مقام انہیں اچانک حاصل نہیں ہوا بلکہ اس کے پیچھے 12 سال کی مسلسل محنت، لگن اور جدوجہد شامل ہے۔واضح رہے کہ رجب بٹ پاکستان کے مقبول یوٹیوبرز میں شمار ہوتے ہیں۔ انہوں نے مختصر عرصے میں سوشل میڈیا پر نمایاں مقبولیت حاصل کی، جبکہ اپنی شاہانہ طرز زندگی، مہنگی گاڑیوں، قیمتی گھڑیوں، غیر ملکی دوروں اور پرتعیش تقریبات کے باعث بھی اکثر خبروں میں رہتے ہیں۔رجب بٹ کی آمدن کا بڑا حصہ یوٹیوب، برانڈ تشہیری مہمات اور دیگر تجارتی سرگرمیوں سے حاصل ہونے کا بتایا جاتا ہے۔
