راجپال یادیو کو دہلی ہائی کورٹ سے عارضی ضمانت، تہاڑ جیل سے رہائی کے بعد جذباتی بیان

نئی دہلی( شوبز ڈیسک)بالی ووڈ کے معروف مزاحیہ اداکارراجپال یادیو کودہلی ہائی کورٹ کی جانب سے عارضی ضمانت ملنے کے بعد تہاڑ جیل سے رہا کر دیا گیا ہے۔جیل سے رہائی کے بعد راجپال یادیو نے میڈیا سے گفتگو میں پہلی بار اپنے جذبات کا اظہار کرتے ہوئے مداحوں اور عدالت کا شکریہ ادا کیا۔اداکار کو تقریباً 9 کروڑ بھارتی روپے کے چیک باؤنس اور قرض کے تنازعے کے سلسلے میں قید کا سامنا کرنا پڑا تھا۔ انہوں نے دسمبر 2025 میں عدالت میں پیش ہونے کے بعد خود کو حکام کے حوالے کیا تھا۔عدالت نے مقدمے کی سماعت کے بعد انہیں 18 مارچ 2026 تک عارضی ضمانت دے دی ہے، جس کے تحت وہ حتمی فیصلے تک رہا رہ سکیں گے۔رہائی کے بعد گفتگو کرتے ہوئے راجپال یادیو نے کہا کہ ان کا 30 سالہ فلمی کیریئر 2027 میں مکمل ہو جائے گا اور وہ آئندہ بھی لوگوں کے ساتھ مل کر کام کرنے کا ارادہ رکھتے ہیں۔ انہوں نے کہا کہ اس طویل سفر کے دوران پورا ملک اور بالی ووڈ ان کے ساتھ رہا، جس کی بدولت وہ تقریباً 200 سے 250 فلموں میں کام کر سکے۔اداکار نے مزید کہا، ’’اگر مجھے کسی الزام کا سامنا ہے تو میں اس کا جواب دوں گا اور عدالت میں مکمل طور پر پیش ہوں گا۔‘‘