ممبئی( شو بز ڈیسک)بالی ووڈ اداکارہ رانی مکھرجی نے انکشاف کیا ہے کہ پیدائش کے وقت وہ غلطی سے ایک پنجابی خاندان کے پاس پہنچ گئی تھیں، جبکہ اس خاندان کی نومولود بچی ان کی والدہ کے پاس پہنچا دی گئی تھی۔ایک انٹرویو میں رانی مکھرجی نے اپنے بچپن کا دلچسپ واقعہ بیان کرتے ہوئے بتایا کہ پیدائش کے بعد نرسیں نومولود بچوں کو معمول کے معائنے کے لیے لے جاتی تھیں اور شناخت کے لیے ان پر ٹیگ لگائے جاتے تھے۔ اسی دوران وہ غلطی سے ایک پنجابی خاندان کے کمرے میں چلی گئی تھیں۔اداکارہ کے مطابق ان کی والدہ نے دوسری بچی کو دیکھتے ہی محسوس کرلیا کہ کچھ گڑبڑ ہے، کیونکہ بچی کی آنکھوں کا رنگ مختلف تھا۔ ان کی والدہ نے فوراً کہا کہ یہ ان کی بیٹی نہیں کیونکہ ان کی بیٹی کی آنکھیں بھوری ہیں، لہٰذا ان کی بچی کو تلاش کیا جائے۔بعد ازاں تلاش کے دوران معلوم ہوا کہ پنجابی خاندان کے پاس موجود بچی دراصل رانی مکھرجی تھیں۔ اس خاندان میں اس وقت آٹھویں بیٹی کی پیدائش ہوئی تھی۔رانی مکھرجی نے بتایا کہ مذکورہ خاندان کے افراد بعد میں بھی مذاقاً ان سے کہتے رہے کہ وہ دراصل پنجابی ہیں اور غلطی سے مکھرجی خاندان کا حصہ بن گئی تھیں۔واضح رہے کہ رانی مکھرجی 21 مارچ 1978 کو فلمساز اور ہدایتکار رام مکھرجی اور ان کی اہلیہ کرشنا مکھرجی کے ہاں پیدا ہوئی تھیں۔
