بھارتی فضائیہ کے طیاروں کے مسلسل حادثات، جنگی تیاریوں پر سوالات اٹھ گئے

نئی دہلی( مانیٹرنگ ڈیسک) نئی دہلی میں بھارتی فضائیہ کے جنگی طیاروں کے بار بار پیش آنے والے حادثات نے عالمی سطح پر تشویش اور تنقید کو جنم دیا ہے۔بھارتی جریدے انڈیا ٹوڈے کے مطابق آسام کے ضلع جوروہاٹ میں بھارتی فضائیہ کا طیارہ اے این-32 حادثے کا شکار ہو گیا، اور ابتدائی رپورٹس میں بتایا گیا ہے کہ لینڈنگ کے بعد طیارے میں آگ بھڑک اٹھی۔رپورٹ کے مطابق بھارتی فضائیہ نے بھی اس حادثے کی تصدیق کر دی ہے۔ ذرائع کا کہنا ہے کہ رواں سال اب تک بھارتی فضائیہ کے 11 جنگی طیارے اور ایک ہیلی کاپٹر حادثات کا شکار ہو چکے ہیں۔دفاعی ماہرین کے مطابق مسلسل حادثات بھارتی فضائیہ کی تیاریوں اور تکنیکی صلاحیتوں پر سوالات اٹھا رہے ہیں، جبکہ ان واقعات سے اس کی اندرونی انتظامی اور تکنیکی کمزوریوں کا بھی اندازہ ہوتا ہے۔ماہرین کا کہنا ہے کہ بار بار ہونے والے یہ حادثات نہ صرف دفاعی نظام کے لیے تشویشناک ہیں بلکہ عالمی سطح پر اس کی ساکھ پر بھی اثر ڈال رہے ہیں۔