روسی ہیکرز پر بلیو اسکائی اکاؤنٹس ہیک کر کے یوکرین مخالف پروپیگنڈا پھیلانے کا الزام

 لاہور( ویب ڈیسک)ایک نئی تحقیق اور رپورٹ میں دعویٰ کیا گیا ہے کہ روسی ہیکرز نے سوشل میڈیا پلیٹ فارم بلیو اسکائی پر سینکڑوں اکاؤنٹس ہیک کر کے انہیں جعلی خبروں اور پروپیگنڈا مواد کی تشہیر کے لیے استعمال کیا۔امریکی اخبار نیویارک ٹائمز کے مطابق اپریل سے اب تک تقریباً دو ہزار ایسی پوسٹس ہٹائی جا چکی ہیں، جو مختلف وقفوں سے سامنے آتی رہیں۔ماہرین کا کہنا ہے کہ یہ سرگرمیاں آن لائن گمراہ کن معلومات پھیلانے کی روسی مہم میں ایک نئے اور زیادہ جارحانہ مرحلے کی نشاندہی کرتی ہیں، جس کا مقصد یوکرین کے حق میں عوامی رائے کو متاثر کرنا بتایا جا رہا ہے۔کلیمسن یونیورسٹی کے میڈیا فارنزکس ہب کے ڈائریکٹر ڈیرن لنول کے مطابق روسی ہیکرز اپنی حکمتِ عملی مسلسل تبدیل کر رہے ہیں، جہاں پہلے فرضی اکاؤنٹس اور من گھڑت مواد استعمال ہوتا تھا، اب ہیک کیے گئے حقیقی اکاؤنٹس کے ذریعے مواد پھیلایا جا رہا ہے۔تحقیقی گروپ ’ڈی ٹیم‘ نے ان سرگرمیوں کا تعلق ماسکو میں قائم کمپنی سوشل ڈیزائن ایجنسی سے جوڑا ہے، جس پر پہلے بھی آن لائن پروپیگنڈا اور غلط معلومات پھیلانے کے الزامات عائد کیے جا چکے ہیں۔