ممبئی( سپورٹس ڈیسک) بھارتی کرکٹ ٹیم کے اسسٹنٹ کوچ ریان ٹن ڈوشیٹے نے اپنے عہدے سے استعفیٰ دے دیا ہے، جبکہ وہ اب انڈین پریمیئر لیگ (آئی پی ایل) کی فرنچائز کولکتہ نائٹ رائیڈرز کے کوچنگ اسٹاف کا حصہ بننے جا رہے ہیں۔بھارتی میڈیا رپورٹس کے مطابق ریان ٹن ڈوشیٹے نے انگلینڈ میں موجودگی کے دوران بھارتی کرکٹ بورڈ کو اپنے فیصلے سے آگاہ کر دیا تھا، تاہم ان کے استعفے کی باضابطہ تصدیق تاحال سامنے نہیں آئی۔رپورٹس کے مطابق بھارتی ٹیم کے ساتھ ان کا معاہدہ جولائی 2024 سے جولائی 2026 تک تھا، جو رواں ماہ مکمل ہو چکا ہے۔ریان ٹن ڈوشیٹے نے راہول ڈریوڈ کے بعد گوتم گمبھیر کے ہیڈ کوچ مقرر ہونے پر بھارتی ٹیم کے معاون عملے میں شمولیت اختیار کی تھی۔ وہ ٹیم کے لیے بیٹنگ اور فیلڈنگ کے شعبوں میں اہم ذمہ داریاں انجام دیتے رہے۔بھارتی میڈیا کے مطابق ان کے دور میں بھارت نے 2025 کا ایشیا کپ جیتا اور 2026 میں آئی سی سی ٹی ٹوئنٹی ورلڈ کپ کا دفاع بھی کیا، تاہم ٹیسٹ کرکٹ میں ٹیم کو مشکلات کا سامنا رہا۔رپورٹس کے مطابق بھارت کو آسٹریلیا کے خلاف بارڈر گواسکر ٹرافی میں شکست کا سامنا کرنا پڑا، جبکہ اپنی سرزمین پر نیوزی لینڈ کے خلاف 3-0 اور جنوبی افریقا کے خلاف 2-0 سے ٹیسٹ سیریز بھی گنوا دی۔واضح رہے کہ ریان ٹن ڈوشیٹے اس سے قبل کولکتہ نائٹ رائیڈرز کے کھلاڑی بھی رہ چکے ہیں اور 2012 اور 2014 میں آئی پی ایل ٹائٹل جیتنے والی ٹیم کا حصہ تھے۔
