کراچی ( شو بز ڈیسک) پاکستانی اداکار، پروڈیوسر اور میزبان یاسر حسین نے کہا ہے کہ سینئر اداکارہ صبا فیصل ملک کی بڑی اسٹار ہیں، اس لیے انہیں ان کے خیالات کی بنیاد پر سوشل میڈیا پر تنقید اور ٹرولنگ کا نشانہ نہیں بنانا چاہیے۔یاسر حسین اپنے بے باک مؤقف اور متنازع بیانات کے باعث اکثر خبروں میں رہتے ہیں۔ حال ہی میں انہوں نے ایک پوڈکاسٹ میں شرکت کی، جہاں شوبز انڈسٹری کے مختلف معاملات اور اپنے ساتھی فنکاروں کے بارے میں کھل کر اظہارِ خیال کیا۔گفتگو کے دوران یاسر حسین نے صبا فیصل کی اداکاری کو سراہتے ہوئے کہا کہ وہ ایک بہترین فنکارہ ہیں، جو امیر اور غریب دونوں طبقوں سے تعلق رکھنے والے کرداروں کو بخوبی نبھانے کی صلاحیت رکھتی ہیں۔ ان کے مطابق صبا فیصل نہ صرف خوب صورت ہیں بلکہ اسکرین پر ان کی موجودگی بھی ناظرین کو متاثر کرتی ہے۔ہدایت کار یاسر حسین کا کہنا تھا کہ صبا فیصل کو ان کے خیالات کی وجہ سے غیر ضروری طور پر تنقید کا نشانہ نہیں بنایا جانا چاہیے، کیونکہ وہ پاکستان کی بہترین فنکاراؤں میں شمار ہوتی ہیں۔انہوں نے مزید کہا کہ سینئر فنکاروں کے لیے سوشل میڈیا کے بدلتے ہوئے رجحانات کے ساتھ خود کو ہم آہنگ کرنا بعض اوقات مشکل ہوتا ہے، تاہم صبا فیصل کو ان کے متنازع بیانات کے بجائے ان کی اداکاری اور فنی خدمات کے حوالے سے یاد رکھا جانا چاہیے۔واضح رہے کہ صبا فیصل پاکستانی شوبز انڈسٹری کی معروف اداکارہ ہیں اور اپنی اداکاری کے باعث خاصی مقبولیت رکھتی ہیں۔ تاہم خواتین سے متعلق ان کے بعض بیانات اور خیالات پر انہیں اکثر سوشل میڈیا پر تنقید کا سامنا کرنا پڑتا ہے۔
