سیف علی خان کی انسٹاگرام پر باضابطہ آمد، خفیہ اکاؤنٹ کا راز بھی کھل گیا

ممبئی( شو بز ڈیسک)بالی وڈ کے معروف اداکار سیف علی خان نے کئی برس تک خفیہ انسٹاگرام اکاؤنٹ استعمال کرنے کے بعد بالآخر سوشل میڈیا پلیٹ فارم پر باضابطہ طور پر اپنی موجودگی کا اعلان کردیا۔بھارتی میڈیا رپورٹس کے مطابق اداکار طویل عرصے سے انسٹاگرام پر ایک خفیہ اکاؤنٹ کے ذریعے سرگرم تھے، تاہم اب انہوں نے اپنا سرکاری اکاؤنٹ متعارف کروا دیا ہے۔سیف علی خان نے اپنا اکاؤنٹ ’سیف علی خان پٹودی‘ کے نام سے بنایا ہے، جس پر انہوں نے اپنی ذاتی کتب گاہ سے ایک تصویر بھی شیئر کی ہے۔فی الحال ان کے سرکاری اکاؤنٹ پر صرف ایک پوسٹ موجود ہے، جبکہ ان کے اکاؤنٹ کو فالو کرنے والی واحد شخصیت ان کی اہلیہ اور اداکارہ کرینہ کپور ہیں۔واضح رہے کہ تقریباً دو برس قبل ’ہندوستان ٹائمز‘ کو دیے گئے ایک انٹرویو میں سیف علی خان نے بتایا تھا کہ انہیں انسٹاگرام دیکھنے میں زیادہ دلچسپی نہیں۔ ان کے مطابق، ان کے فون میں انسٹاگرام کی ایپ موجود تھی اور وہ ایک خفیہ اکاؤنٹ بھی استعمال کرتے تھے، جسے کبھی کبھار دیکھ لیتے تھے، تاہم انہیں اس میں کوئی خاص لطف محسوس نہیں ہوتا تھا۔