لاہور( شوبز ڈیسک)پاکستان شوبز انڈسٹری کی سینئر اداکارہ صائمہ نور کی فٹنس میں نمایاں تبدیلی اور بھرپور توانائی سوشل میڈیا پر صارفین کی توجہ کا مرکز بن گئی ہے۔سوشل میڈیا پر گردش کرنے والی ویڈیوز میں 58 سالہ صائمہ نور کو اسکواٹس، کیٹل بیل سوئنگز اور دیگر سخت ورزشیں کرتے دیکھا جا سکتا ہے، جس پر صارفین نے ان کی جسمانی طاقت، اسٹیمنا اور صحت مند طرزِ زندگی کو سراہا ہے۔دیگر ویڈیوز میں اداکارہ کو ایک سیلون کا دورہ کرتے ہوئے بھی دیکھا گیا، جہاں ان کے وزن میں واضح کمی نمایاں ہے۔مداحوں نے صائمہ نور کو ہمیشہ جوان نظر آنے والی شخصیت قرار دیتے ہوئے ان کی فٹنس کی تعریف کی، جبکہ کچھ صارفین نے دلچسپ تبصرے کرتے ہوئے کہا کہ ویڈیوز اتنی متاثر کن ہیں کہ بظاہر مصنوعی ذہانت سے تیار کردہ محسوس ہوتی ہیں۔اسی دوران اداکارہ کے پرانے انٹرویو کلپس بھی دوبارہ مقبول ہو گئے، جن میں انہوں نے اپنی صحت اور فٹنس کے حوالے سے بات کی تھی۔صائمہ نور نے بتایا تھا کہ ایک وقت میں انہیں محسوس ہوتا تھا کہ ان کا وزن بڑھ گیا ہے، جس کے بعد انہوں نے اپنی صحت بہتر بنانے کے لیے طرزِ زندگی میں بڑی تبدیلیاں کیں۔
