لاہور (شوبز ڈیسک) پاکستانی شوبز انڈسٹری کی معروف اداکارہ سوہائے علی ابڑو نے اپنے شوہر شہزار محمد سے علیحدگی سے متعلق گردش کرنے والی افواہوں کی تردید کر دی ہے۔گزشتہ کچھ عرصے سے سوشل میڈیا پر یہ چہ مگوئیاں جاری تھیں کہ سوہائے علی ابڑو اور ان کے شوہر کے درمیان علیحدگی ہو چکی ہے، تاہم اداکارہ نے اپنی حالیہ انسٹاگرام پوسٹ کے ذریعے ان خبروں کو بے بنیاد قرار دیا۔انہوں نے اپنی تازہ پوسٹ میں شوہر اور بیٹی کے ساتھ خوشگوار لمحات کی تصاویر شیئر کیں جن میں یہ خاندان ایک خوش و خرم انداز میں نظر آ رہا ہے۔ اداکارہ نے اپنے شوہر کو ’’بہترین والد‘‘ اور ایک ’’خاص انسان‘‘ قرار دیتے ہوئے ان کے لیے محبت بھرے جذبات کا اظہار بھی کیا۔یہ تصاویر سامنے آنے کے بعد علیحدگی سے متعلق افواہیں دم توڑ گئیں جبکہ مداحوں نے اس جوڑے کے لیے نیک خواہشات اور محبت بھرے پیغامات کا اظہار کیا ہے۔یاد رہے کہ سوہائے علی ابڑو نے مارچ 2021 میں سابق کرکٹر سلیم محمد کے بیٹے شہزار محمد سے شادی کی تھی۔ اس جوڑے کی ایک بیٹی بھی ہے۔شادی کے بعد اداکارہ نے کچھ عرصے کے لیے شوبز سرگرمیوں سے وقفہ لیا تھا، تاہم 2024 میں ڈرامہ ’’جینٹلمین‘‘ کے ذریعے دوبارہ اسکرین پر واپسی کی۔ اس وقت وہ مختلف ٹی وی اور شوبز منصوبوں میں مصروف ہیں۔
