ممبئی( شو بز ڈیسک)بالی ووڈ اداکار سلمان خان نے اپنے بھائی سہیل خان کی طلاق پر گفتگو کرتے ہوئے کہا ہے کہ انہوں نے سہیل کو ماضی کے تعلق سے نکل کر آگے بڑھنے اور دوبارہ زندگی میں خوشیاں تلاش کرنے کا مشورہ دیا ہے۔ایک رئیلٹی شو کی حالیہ قسط میں سلمان خان اور سہیل خان کے درمیان جذباتی گفتگو ہوئی، جس میں دونوں بھائیوں نے سہیل اور ان کی سابق اہلیہ سیما سجدیہہ کی ازدواجی زندگی اور علیحدگی پر بات کی۔سلمان خان نے کہا کہ ہر رشتے میں مشکلات اور اختلافات آتے ہیں، اصل فیصلہ یہ ہوتا ہے کہ انسان ان مسائل کا سامنا کرتے ہوئے رشتہ برقرار رکھنا چاہتا ہے یا الگ راستہ اختیار کرتا ہے۔انہوں نے سہیل سے کہا کہ وہ خود کو ضرورت سے زیادہ قصوروار نہ سمجھیں، کیونکہ انہوں نے بھی رشتہ بچانے کی پوری کوشش کی اور سیما نے بھی اپنی طرف سے کوشش کی، مگر بعض اوقات حالات انسان کے حق میں نہیں ہوتے۔سلمان خان نے سیما سجدیہہ کے ایک انٹرویو کا حوالہ دیتے ہوئے کہا کہ انہوں نے اپنے رشتے کو ایک وقت کے بعد مشکل اور نقصان دہ قرار دیا تھا، تاہم ہر شادی شدہ جوڑے کے درمیان اختلافات ہوتے ہیں، اہم بات یہ ہے کہ ان کا حل کیسے نکالا جاتا ہے۔بالی ووڈ اسٹار نے مزید کہا کہ سہیل نے جتنی کوشش کرنی تھی وہ کر چکے، اب بہتر ہے کہ وہ نئی زندگی کی جانب بڑھیں۔ انہوں نے یہ بھی یاد کیا کہ سہیل اور سیما کی محبت کے ابتدائی دنوں میں جب سہیل نے شادی کا فیصلہ بتایا تھا تو وہ فلم ہم دل دے چکے صنم کی شوٹنگ میں مصروف تھے۔واضح رہے کہ سہیل خان اور سیما سجدیہہ کی شادی 1998 میں ہوئی تھی، تاہم دونوں کے درمیان 2022 میں طلاق ہوگئی۔ سابق جوڑے کے دو بیٹے نروان اور یوہان ہیں۔
