ممبئی( شو بز ڈیسک)بالی ووڈ کے معروف اداکار سلمان خان نے ممبئی کے علاقے باندرہ ویسٹ میں واقع اپنا اپارٹمنٹ 3 کروڑ 50 لاکھ بھارتی روپے میں فروخت کر دیا۔بھارتی میڈیا کے مطابق سلمان خان نے یہ اپارٹمنٹ 2015 میں 2 کروڑ 88 لاکھ بھارتی روپے میں خریدا تھا، جسے 9 جولائی کو فروخت کیا گیا۔رپورٹس کے مطابق یہ اپارٹمنٹ باندرہ ویسٹ کے علاقے میں واقع شیو آستھان ہائٹس میں تھا، جبکہ جائیداد کی رجسٹری دستاویزات کے مطابق اسے متعدد خریداروں نے خریدا ہے۔خریداروں کی جانب سے 21 لاکھ بھارتی روپے اسٹامپ ڈیوٹی اور 30 ہزار بھارتی روپے رجسٹریشن فیس بھی ادا کی گئی۔60 سالہ سلمان خان اس وقت اپنے اہل خانہ کے ہمراہ باندرہ کے مشہور گیلیکسی اپارٹمنٹس میں رہائش پذیر ہیں۔رپورٹس کے مطابق سلمان خان نے گزشتہ برسوں میں مختلف رہائشی اور تجارتی جائیدادوں میں سرمایہ کاری کی ہے، جبکہ انہیں حال ہی میں اسی علاقے میں نئی 6 منزلہ رہائش گاہ تعمیر کرنے کی منظوری بھی مل چکی ہے۔باندرہ ویسٹ ممبئی کا وہ معروف علاقہ ہے جہاں شاہ رخ خان، ریکھا اور سنجے دت سمیت بھارتی فلم انڈسٹری کی کئی مشہور شخصیات بھی مقیم ہیں۔
