چندی گڑھ( شوبز ڈیسک) مقامی عدالت نے اداکار سلمان خان، ان کی بہن الویرا خان اگنی ہوتری اور اسٹائل اینڈ کنٹینٹ جیولری پرائیویٹ لمیٹڈ کے ڈائریکٹرز کو مبینہ دھوکا دہی کے مقدمے میں طلب کر لیا۔بھارتی میڈیا کے مطابق عدالت نے تمام نامزد افراد کو 5 اکتوبر کو پیش ہو کر اپنے خلاف عائد الزامات کا جواب جمع کرانے کی ہدایت کی ہے۔رپورٹ کے مطابق مقدمہ چندی گڑھ کے تاجر ارون گپتا کی درخواست پر درج کیا گیا۔ ان کا مؤقف ہے کہ انہیں ’بینگ ہیومن‘ جیولری کا شوروم قائم کرنے کے لیے مبینہ طور پر جھوٹے وعدوں کے ذریعے آمادہ کیا گیا، جس کے نتیجے میں انہیں کروڑوں روپے کا مالی نقصان اٹھانا پڑا۔
