سلمان خان کی سونم وانگچک سے بھوک ہڑتال ختم کرنے کی اپیل، طلبہ کو بھی گھر جانے کا مشورہ

ممبئی( شوبز ڈیسک) بالی ووڈ اداکار سلمان خان نے معروف سماجی کارکن سونم وانگچک سے بھوک ہڑتال ختم کرنے کی اپیل کرتے ہوئے طلبہ سے بھی کہا ہے کہ وہ اپنے گھروں کو واپس لوٹ جائیں۔بھارت میں نیٹ (NEET) امتحانات میں مبینہ پیپر لیک معاملے پر طلبہ کے احتجاج سے اظہارِ یکجہتی کے لیے اسپتال میں بھوک ہڑتال پر بیٹھے سونم وانگچک کی حمایت میں سلمان خان نے سماجی رابطے کی ویب سائٹ انسٹاگرام پر ایک پیغام جاری کیا۔سلمان خان نے اپنے پیغام میں کہا کہ طلبہ سب کی پہلی ترجیح ہیں، چاہے معاملہ تعلیم کا ہو یا ان کی سلامتی کا۔ انہوں نے طلبہ اور والدین کو یقین دلایا کہ انہیں پریشان ہونے کی ضرورت نہیں۔اداکار نے کہا کہ وزیراعظم کی جانب سے سخت کارروائی کی یقین دہانی کرائی گئی ہے، اس لیے تمام طلبہ سے اپیل ہے کہ وہ اپنے گھروں اور والدین کے پاس واپس چلے جائیں۔سونم وانگچک کو مخاطب کرتے ہوئے سلمان خان نے محبت بھرے انداز میں لکھا کہ اب بہت ہو گیا، مزید خود کو تکلیف نہ دیں، اپنی توانائی مستقبل کے لیے محفوظ رکھیں اور کچھ کھا لیں۔ انہوں نے یہ بھی کہا کہ اگر ضرورت ہو تو وہ اپنے گھر سے کھانا بھجوا سکتے ہیں۔واضح رہے کہ لداخ سے تعلق رکھنے والے ماحولیاتی کارکن سونم وانگچک نیٹ پیپر لیک معاملے پر وفاقی وزیر تعلیم کے استعفے کے مطالبے کے لیے 28 جون سے بھوک ہڑتال پر ہیں۔